पुणे : फर्ग्युसन महाविद्यालयात बी. एस्सी. च्या (भौतिकशास्त्र) तिसऱ्या वर्षात शिकणाऱ्या विद्यार्थ्याने गळफास घेऊन आत्महत्या केल्याची घटना गुरुवारी घडली. या घटनेची चतु:शृंगी पोलिस ठाण्यात नोंद करण्याचे काम रात्री उशिरापर्यंत सुरू होते.ओम कापडणे ( वय २०) असे आत्महत्या केलेल्या विद्यार्थ्याचे नाव आहे. वडारवाडी येथील विष्णू कुंज वसतिगृहात ओमने गुरुवारी गळफास घेतला. ही माहिती मिळताच हेल्परायडर्स संघटनेचे पंकज घरडे आणि अभिजित मेश्राम घटनास्थळी पोहोचले. ओम याला खासगी रुग्णालयात दाखल करण्यात आले.
मात्र, उपचारांपूर्वीच त्याचा मृत्यू झाला होता.ओम मूळचा नाशिक येथील आहे. तो विष्णू कुंज वसतिगृहात राहत होता. गुरुवारी सायंकाळी त्याने गळफास घेऊन आत्महत्या केला. घटनास्थळी चिठ्ठी आढळून आलेली नाही. ओमने हे पाऊल का उचलले, याचा तपास सुरू आहे, असे चतु:शृंगी पोलीस ठाण्याचे पोलीस निरीक्षक अंकुश चिंतामण यांनी सांगितले.
