प्रविण चौरे
साहित्य क्षेत्रातील प्रसिद्ध व्यक्तिमत्व लेखक पु. ल. देशपांडे यांच्या प्रेरणेतून लेखक डॉ. अनिल अवचट, डॉ अनिता अवचट, डॉ. आनंद नाडकर्णी यांनी ३७ वर्षापूर्वी पुणे येथे स्थापन केलेल्या मुक्तांगण व्यसनमुक्ती केंद्र संस्थेच्या संचालिका डॉ. मुक्ता पुणतांबेकर या शनिवार दिनांक ६ मे,२०२३ रोजी रोटरी हॉल, गंजमाळ नाशिक येथे उपस्थित राहून उपस्थितांना मार्गदर्शन करणार आहेत.
नुकतेच मुक्ता पुणतांबेकर यांना त्यांच्या मुक्तांगणच्या व्यसनमुक्तीच्या तीन तापाच्या कार्यासाठी राजभवन, मुंबई येथे राज्यपालांच्या हस्ते " सूर्यदत्ता राष्ट्रीय स्त्री शक्ती " पुरस्काराने सन्मानित करण्यात आले आहे. नाशिक मध्येही गेली कित्येक वर्ष मुक्तांगणचे व्यसनमुक्तीचे काम अहोरात्र चालू आहे.यासाठी नाशिक मध्ये २५० ते ३०० मुक्तांगण मित्र कोणाच्याही मदतीस सदैव तत्पर असतात. नाशिक येथे दर महिन्याच्या पहिल्या शनिवारी सायंकाळी ६ वाजता रोटरी हॉल, गंजमाळ, नाशिक येथे मुक्तांगण केंद्रातर्फे व्यसन मुक्तीसाठी व्यसन करणारे आणि त्यांचे नातेवाईक, मित्र परिवार यांचे समुपदेशन केले जाते.
या उपक्रमाअंतर्गत शनिवार दिनांक ६ मे रोजी नाशिकच्या केंद्रामध्ये स्वतः मुक्तांगणच्या संचालिका डॉ. मुक्ता पुणतांबेकर नाशिककरांना अनमोल मार्गदर्शन करणार आहेत. सोबत मुक्तांगण समुपदेशक निहार हसबनीस हे असतील.या कार्यक्रमाला उपस्थित राहण्याचे आवाहन संदीप धोपावकर, अविनाश ढोली, विश्वास वावधने, योगेश कुलकर्णी, संदीप कुलकर्णी, आदी सर्व मुक्तांगण मित्र परिवार, नाशिक यांनी केले आहे.
