वडील मृत्यू शी झुंज देत असतांना अपूर्वा ने अश्रुना डोळ्यांत साठवत दिला पेपर.
प्रविण चौरे ओझर प्रतिनिधी
ओझर :- एखाद्याची परीक्षा नियती कशी घेते याचा विचार ही आपण करू शकत नाही. परंतु नियतीच्या या परीक्षेत जो स्वतः ला झोकून देत आलेल्या प्रसंगाशी दोन हात करत संकटापेक्षा कष्ट किती मोठे आहेत हे आव्हान जेंव्हा उभे करतो तेंव्हा नियतीलाही त्या जिद्दी पुढे हात टेकावे लागतात, अशीच काहीशी प्रचिती ओझरकराना अनुभवायला मिळाली आहे. लोकांच्या घरी जाऊन धुनी भांडी करणाऱ्या एका आईचच्या कष्टाची जाणीव ठेवून अपूर्वा वाकोडे पोलीस भरतीस उतरली आणि नुसती पास च झाली नाही तर पुणे शहर पोलीस दलात ती मुलींमध्ये प्रथम आली आहे.
ओझर येथील मरिमाता गेट येथे पत्र्याच्या कौलारू घरात राहणारी अपूर्वा वाकोडे हिची नुकत्याच झालेल्या पोलीस भरती परीक्षेत पुणे शहर पोलीस दलात निवड झाली आहे. तिने पुणे शहर पोलीस दलात मुलींमध्ये प्रथम क्रमांकाने उत्तीर्ण होण्याचा मान पटकावला आहे.अपूर्वा ला पोलीस भरती साठी तिचे बाबा रामदास गांगुर्डे यांचे प्रोत्साहन व मार्गदर्शन लाभले आहे.
अपूर्वा चा ज्या दिवशी पोलीस भरतीचा लेखी पेपर होता त्याच दिवशी तिचे वडील मात्र नाशिक येथील हॉस्पिटल मध्ये मृत्यू शी झुंज देत होते. टेलर काम करणारे राजू वाकोडे यांना पंधरा दिवसा पूर्वी ब्रेन स्ट्रोक झाला होता तरी याही परिस्थितीत अपूर्वाने जिद्द न सोडता अश्रुना डोळ्यात साठवून लेखी परीक्षा दिली. मात्र पेपर देऊन संध्याकाळी घरी पोहचताच वडिलांनी जगाचा निरोप घेतला.
अनेक जन आपल्या अपयशाचे खापर स्वतःच्या गरीब परिस्थितीला देत असतात मात्र अपूर्वा याला अपवाद ठरली आहे. आता तिला वडील नाहीत आई आधीपासूनच लोकांच्या घरोघरी जाऊन धुनी भांडी करते वेळ प्रसंगी द्राक्ष बागेच्या व कांद्याच्या चाळीवर कामाला जात असताना अपूर्वा देखील आईला या कामात मदत करण्या साठी द्राक्षबाग, कांद्याच्या चाळीत जाते. काम करूनच तिने बिकॉम पुर्ण केले स्वतः सोबतच लहान दोन भावांनाही शिक्षण पूर्ण करण्यास प्रोत्साहन दिले.परिस्थिती नाजूक असतानाही त्याची तमा न बाळगता मोठ्या हिमतीने यश संपादन करत इतरांना प्रेरणादायी कार्य केले आहे.गरिबीची हलाखीची परिस्थिती असून सुद्धा कशाप्रकारे यश मिळवता येते याचं हे उत्तम उदाहरण. पोलीस म्हणून मुलगी जेव्हा पुढे येते, तेव्हा तिच्या अंगी असलेली जिद्द, आणि चिकाटी, ही गुणसंपदा खऱ्या अर्थाने प्रेरणा घेण्यासारखी आहे. प्रेरणादायी यश संपादन केल्याने ओझर कर जनता तसेच अनेक समाजसेवी संघटना, ज्ञानेश्वरी अभ्यासिका मित्र परिवार व निफाड भाजप विधानसभा प्रमुख यतीन कदम यांच्या तर्फे अपूर्वा चा सत्कार करत कौतुकांचा वर्षाव करण्यात आला.
बार्टीच्या प्रशिक्षण कार्यक्रमाचा झाला फायदा.
डॉ. बाबासाहेब आंबेडकर संशोधन व प्रशिक्षण संस्था पुणे या शैक्षणिक संस्थेच्या नाशिक येथे झालेल्या प्रशिक्षण कार्यशाळे चा लेखी परीक्षेचा अभ्यास करण्यासाठी अपूर्वा ला फायदा झाला आहे. एप्रिल ते जुलै २०२२दरम्यान तिने चार महिन्याचे शिकवणी तास पुर्ण केले या दरम्यान तिला शिष्यवृत्ती देखील मिळाली होती.
पोलीस वाहन चालक पदावर झाली निवड.
के .व्ही .नाईक .कॉलेज क्लास ४५दिवस् पूर्ण केला . महेंद्रा फायनान्स संस्थे तर्फे आर्थिक परिस्थिती नसलेल्या विद्यार्थ्यासाठी फक्त १००० भरून घेण्यात येणारा मोटार ड्रायव्हिंग क्लास अपूर्वाने पुर्ण केला होता क्लास पूर्ण झाल्यावर १००० रु परत मिळाले होते याच प्रशिक्षणाचा तिने फायदा घेत पोलीस वाहन चालक या पदासाठी फॉर्म भरला होता. या भरती प्रक्रिया दरम्यान तिने बोलेरो, सुमो यासारख्या छोटया वाहणासोबत पोलीस बस व पोलीस टेम्पो ट्रॅव्हलर यासारखे मोठे वाहन चालवून दाखवत यश संपादन केले आहे.
मला मिळालेल्या यशच्या मागे माझ्या आई - वडील, २ भाऊ यांचा खूप मोठा वाटा आहे २०१८ ते २०२३ अशा ६ वर्षाच्या मेहनतीनंतर मला हे यश मिळालं . माझ्या बाबा म्हणजेच रामदास गांगुर्डे यांच्या कडून सतत प्रेरणा व मार्गदर्शन मिळाले.जिद्द ,मेहनत ,चिकाटी असेल तर आपण कोणत्याही ध्येयापर्यंत पोहचू शकतो. अपूर्वा राजू वाकोडे पुणे शहर पोलीस, ओझर
